Return to site

莊端兒自認「毒女」 想另一半陪打機

莊端兒(Xenia)、林耀聲同女友張沛樂(沙律)等,今晚喺又一城出席真人動漫電影《銀魂2:規矩是為了被打破而存在的》首映禮,Xenia以低胸性感長裙現身,佢話自己係「毒女」,最鍾意打機睇動漫,會為打機而不眠不休,更曾試過為打機課金幾千蚊,好麻甩!佢亦都曾cosplay過《銀魂》神樂一角,問佢係咪好鍾意毒男?佢笑話:「我鍾意另一半陪我打機,但外表唔可以太毒,性格毒就無防,因為會比較專一。」

而林耀聲同沙律都鍾意睇動漫,沙律仲踢爆男友唔敢睇恐怖片,林耀聲話:「我唔鍾意被嚇到個心離一離嘅感覺,不過拍恐怖片就無問題,因為現場好多人,又知劇本內容,之前喺馬來西亞拍咗一部恐怖片,戲中我扮鬼,所以唔太驚,但最後一日喺酒店執行李準備返香港,房嘅電視突然自己開,冷氣機又突然有聲,嚇到我即時爆粗,心諗要快啲離開。」林耀聲又反爆女友怕曱甴,沙律話:「我唔怕,見到會跨過去係正常反應,我比較唔鍾飛蛾同蝴蝶呢類會『嬲』住我嘅昆蟲。」

All Posts
×

Almost done…

We just sent you an email. Please click the link in the email to confirm your subscription!

OK