Return to site

林敏驄拍賀歲片玩死阿Bob 35E莊端兒谷胸浸浴誘喪屍

「鬼才」59歲林敏驄(大師)踩過界,首度自編自導自演賀歲電影《如珠如寶》,找來新一代喜劇演員張繼聰、林盛斌(Bob)及「鬼馬五福星」洪金寶(大哥大)、泰迪羅賓(Teddy)、梁小龍、吳耀漢及林雪演出。開工第一日拍攝重頭戲「喪屍浴蒲團」,林敏驄要求35E「導彈胸」莊端兒穿上細碼比堅尼在戶外浸浴三粒鐘兼畀喪屍們圍攻,混亂間阿Bob被張繼聰摑完又踢,監場的林大師曾跟Bob傳不和,「奸計得逞」的大師笑說:「觀眾鍾意睇Bob被打嘛!」
當日一眾演員在經典猛鬼地元朗達德學校拍通宵戲,Teddy大讚莊端兒:「係正常男人都會流晒鼻血啦,點會唔流啫!」在旁的「人夫」張繼聰即刻彈開,目不斜視說:「我近視睇唔清楚,而且唔想令穿得性感嘅女演員尷尬,都係坐開啲好。」對於混亂間被推跌,Teddy話有地墊護身,唔怕傷了老骨頭。
想做搞笑肉彈
  浸水浸足三小時的莊端兒搞到全身皺晒皮,要飲熱水暖身,雖然怕凸腩所以連飯都食唔到,但佢唔覺係受虐,「劇組好好,佢哋怕我冷親不停加熱水,而且同一班前穿合作好好玩,佢哋身經百戰望過唔少女仔,喺佢哋面前著泳裝演出都唔會尷尬。不過,唔知點解套泳裝係細size。」問到想唔想接葉子楣及李莉莉捧成為新一代搞笑肉彈?莊端兒強調只要好玩就冇所謂,最好有更多更多報酬。
Bob拍到周身傷
  拍完當日戲,Bob喺社交網上載兩張相,分別影住手臂同小腿瘀痕,並留言:「藍猛衝,第一日你開工啫,已經搞到咁嘞喎,又話係開開心心嘅笑片…」去年林敏驄曾於TVB節目掌摑阿Bob而傳不和,難怪有網友話阿驄呢次係公報私仇。當晚林導演唔止要張繼聰掌摑阿Bob,仲要伸他一腳,大師笑說:「佢抵打,觀眾會睇得好開心!我已book定水鬼隊畀佢再拍跳崖戲,佢畀巴士撞完就跌落崖,但唔好問我個崖有幾高,做人遲早要走㗎啦,要轟轟烈烈咁走。」對於是否公報私仇?佢話:「哈!我唔使郁手嘅。」至於阿Bob就強調兩人冇心病,反而多謝林敏驄邀請令他們擦出「火花」。對於染指影圈,大師強調自己點石成金,撈乜都得。首次執導好滿足,因為要演員做乜就做乜,即使面對強勁賀歲片對手都零壓力:「對手喺自己度,對得住自己就得啦!」

All Posts
×

Almost done…

We just sent you an email. Please click the link in the email to confirm your subscription!

OK